Sangava News

दिवाळीनिमित्त पिंपरी-चिंचवडमधील बाजारपेठा सजल्या; खरेदीसाठी नागरिकांची गर्दी : सुरक्षित व आनंदाने दिवाळी साजरी करा

| सांगावा न्यूज | पिंपरी-चिंचवड, दिनांक ६ : दिवाळी सणाचे औचित्य साधून पिंपरी-चिंचवड शहरातील विविध बाजारपेठा आकर्षक रोषणाई, रंगीबेरंगी सजावट आणि विद्युत दिव्यांनी उजळून निघाल्या आहेत. दिवाळीच्या पार्श्वभूमीवर शहरातील बाजारपेठांमध्ये उत्साहाचे वातावरण निर्माण झाले असून, खरेदीसाठी नागरिकांची मोठी गर्दी होत आहे. सणाच्या स्वागतासाठी व्यापाऱ्यांनीही दुकाने आकर्षक पद्धतीने सजविली आहेत. नागरिकांमध्ये उत्साहाचे व चैतन्याचे वातावरण आहे. पिंपरी चिंचवड महानगरपालिकेचे स्थायी समिती सभापती अभिषेक बारणे यांनी नागरिकांना दीपावलीच्या हार्दिक शुभेच्छा देऊन आनंदाने सुरक्षित दिवाळी साजरी करण्याचे आवाहन केले आहे. बाजारपेठांमधील वाढती गर्दी, फटाके वाजवून साजरा केला जात असलेला आनंद नागरिकांना निर्विघ्न व्यक्त करता यावा तसेच नागरिकांची दिवाळी सुरक्षित साजरी होण्यासाठी प्रशासनाने सतर्क राहून दिवाळीचा आनंद घेण्याचे आवाहन केले.

शहरातील पिंपरी, चिंचवड, निगडी, आकुर्डी, भोसरी, रहाटणी, थेरगाव आणि काळेवाडी परिसरातील बाजारपेठांमध्ये दिवाळीची लगबग पाहायला मिळत आहे. कपडे, आकाशकंदील, पणत्या, रांगोळी, फुलांच्या माळा, तोरणे, सजावटीच्या वस्तू, विद्युत माळा, फटाके आणि मिठाईच्या दुकानांमध्ये ग्राहकांची गर्दी वाढली आहे. विविध प्रकारचे आकाशकंदील आणि आकर्षक पणत्या ग्राहकांचे लक्ष वेधून घेत आहेत.

दिवाळीनिमित्त बाजारपेठांमध्ये पारंपरिक वस्तूंसह आधुनिक सजावटीच्या साहित्यालाही मोठी मागणी आहे. लहान मुलांसाठी कपडे, महिलांसाठी साड्या व दागिने, तसेच घरगुती वापराच्या वस्तूंची खरेदी करण्यासाठी कुटुंबांसह नागरिक बाजारपेठेत दाखल होत आहेत. अनेक ठिकाणी दुकानदारांनी ग्राहकांना आकर्षित करण्यासाठी विविध वस्तूंची आकर्षक मांडणी केली आहे.

दरम्यान, दिवाळीच्या खरेदीमुळे बाजारपेठांमध्ये वाहनांची वर्दळ वाढली असून काही प्रमुख रस्त्यांवर वाहतूक कोंडी होत आहे. महापालिका प्रशासनानेही नागरिकांना सुरक्षिततेच्या दृष्टीने आवश्यक काळजी घेण्याचे आवाहन केले आहे.

एकंदरीत, दिव्यांचा झगमगाट, सजावटीच्या वस्तूंची रेलचेल आणि ग्राहकांची लगबग यामुळे पिंपरी-चिंचवड शहरात दिवाळीचा उत्साह ओसंडून वाहत आहे. बाजारपेठांमधील या उत्साही वातावरणामुळे व्यापाऱ्यांमध्येही समाधानाचे वातावरण आहे. 

महापौर रवी लांडगे यांच्यासह राजकीय, सामाजिक, शैक्षणिक क्षेत्रातील मान्यवरांची उपस्थिती

| सांगावा न्यूज | भोसरी, दिनांक ६ नोव्हेंबर २०२६ : नागरिकांच्या समस्या जाणून घेऊन त्या सोडविण्यासाठी, सर्वसामान्यांना हक्काचे व्यासपीठ उपलब्ध करून देण्यासाठी आणि प्रभागाच्या विकासाला अधिक गती देण्यासाठी भारतीय जनता पार्टीचे प्रभाग क्रमांक ८ मधील नगरसेवक डॉ. सुहास लक्ष्मण कांबळे यांच्या जनसंपर्क कार्यालयाचा उद्घाटन सोहळा मोठ्या आनंदात आणि उत्साहात संपन्न झाला. इंद्रायणीनगर, भोसरी येथील 'अन्नपूर्णा' इमारतीमध्ये सुरू करण्यात आलेल्या या जनसंपर्क कार्यालयामुळे परिसरातील नागरिकांसाठी लोकप्रतिनिधींशी थेट संवाद साधण्याचे एक महत्त्वपूर्ण केंद्र उपलब्ध झाले आहे.

या उद्घाटन सोहळ्यात भोसरी विधानसभा मतदारसंघाचे आमदार महेश लांडगे यांच्या शुभहस्ते उद्घाटन करण्यात आले. तसेच पिंपरी-चिंचवड महानगरपालिकेचे महापौर रवी लांडगे यांच्या प्रमुख उपस्थितीने कार्यक्रमाला विशेष महत्त्व प्राप्त झाले.

सुशिक्षित आणि प्रोफेशनल व्यक्तींनी राजकारणात यावे __आमदार महेश लांडगे

यावेळी शुभेच्छापर मनोगत व्यक्त करताना आमदार महेश लांडगे यांनी डॉ. सुहास कांबळे यांचे अभिनंदन केले. ते म्हणाले, "सुशिक्षित आणि सामाजिक दृष्टिकोन असणाऱ्या व्यक्तींनी राजकारणात येणे ही काळाची गरज आहे. अशा व्यक्तींमुळे नागरिकांच्या समस्या अधिक अभ्यासपूर्ण पद्धतीने समजून घेऊन त्या सोडविण्यास मदत होते. याचे उत्तम उदाहरण म्हणजे नगरसेवक डॉ. सुहास कांबळे. त्यांनी लोकसेवेच्या उद्देशाने सुरू केलेले हे जनसंपर्क कार्यालय नागरिकांसाठी निश्चितच उपयुक्त ठरणार आहे. या कार्यालयाच्या माध्यमातून नागरिकांच्या अडीअडचणी सोडविणे अधिक सोपे होणार असून, त्यासाठी आम्ही सर्वजण कटिबद्ध आहोत."

जनतेच्या सेवेसाठी जनसंपर्क कार्यालय २४×७ उपलब्ध राहणार __डॉ. सुहास कांबळे

यावेळी मनोगत व्यक्त करताना नगरसेवक डॉ. सुहास कांबळे म्हणाले, "हे जनसंपर्क कार्यालय सर्व नागरिकांसाठी २४×७ सदैव उपलब्ध राहणार आहे. नागरिकांची कोणतीही अडीअडचण असो, त्यावर मार्ग काढण्यासाठी आणि ती सोडविण्यासाठी आम्ही सातत्याने प्रयत्नशील राहणार आहोत. आमदार महेशदादा लांडगे यांच्या मार्गदर्शनाखाली नागरिकांच्या सेवेसाठी आम्ही सदैव तत्पर आहोत. नागरिकांनी आपल्या समस्या, सूचना आणि अपेक्षा या कार्यालयाच्या माध्यमातून आमच्यापर्यंत पोहोचवाव्यात. जनतेचा विश्वास आणि सहकार्याच्या बळावर प्रभागाच्या सर्वांगीण विकासासाठी काम करणे, हेच आमचे प्रमुख उद्दिष्ट आहे."

राजकीय, सामाजिक आणि शैक्षणिक क्षेत्रातील मान्यवरांची उपस्थिती

यावेळी नगरसेविका नम्रता लोंढे, नगरसेवक योगेश लांडगे, नगरसेवक प्रविण भालेकर, प्रतापराव मोहिते मामा, निलम लांडगे, शिवराज लांडगे, संदिपान झोंबाडे, अशोक आहेर, अनिल सौंदाडे, प्रमोद राणे, संतोष निर्सगंध, चंद्रकांत रासकर, अजहर खान, प्रा. बी. बी. शिंदे, भाऊसाहेब डोळस, गोकुळ गायकवाड, विनोद अहिरे, प्रा. संजीव सूर्यवंशी, डॉ. अनू गायकवाड, डॉ. विश्वजीत गायकवाड, नितीन भोसले, प्रशांत लांडगे, कुंदन काळे, सागर भोसले, महादेव गोमे, अशोक सज्जनशेट्टी, संतोष वरे, संदिप लोखंडे, साई वाघमारे, हरीष शिंदे, बाबुराव लोंढे, संदिप कुंभार, पंकज पवार, ॲड. अतुल कांबळे आणि बाबाजी कळमकर यांच्यासह प्रभाग क्रमांक ८ मधील विविध सेक्टरमधील सोसायटीचे चेअरमन, पदाधिकारी व सभासद तसेच भारतीय जनता पार्टीचे पदाधिकारी आणि कार्यकर्ते मोठ्या संख्येने उपस्थित होते.

नागरिकांच्या प्रश्नांसाठी हक्काचे व्यासपीठ

जनसंपर्क कार्यालय हे केवळ लोकप्रतिनिधींचे कार्यालय न राहता नागरिकांच्या अडचणी, समस्या, सूचना आणि अपेक्षा मांडण्याचे प्रभावी केंद्र व्हावे, हा या उपक्रमामागील मुख्य उद्देश आहे. परिसरातील पाणीपुरवठा, रस्ते, आरोग्य, स्वच्छता, पायाभूत सुविधा, नागरी सोयी-सुविधा तसेच विविध शासकीय योजनांचा लाभ सर्वसामान्यांपर्यंत पोहोचविण्यासाठी या कार्यालयाच्या माध्यमातून सातत्याने पाठपुरावा करण्याचा संकल्प व्यक्त करण्यात आला.

विकासाच्या संकल्पाला जनसहभागाची जोड

प्रभागाच्या सर्वांगीण विकासासाठी लोकप्रतिनिधी, पक्षाचे पदाधिकारी, कार्यकर्ते आणि नागरिक यांनी एकत्रितपणे काम करण्याची गरज आहे. जनतेचा विश्वास हीच लोकप्रतिनिधींची खरी ताकद असून, त्या विश्वासाला विकासकामांच्या माध्यमातून न्याय देण्याचा निर्धार या प्रसंगी अधोरेखित झाला.

उत्साहपूर्ण वातावरणात पार पडलेल्या या उद्घाटन सोहळ्यामुळे प्रभाग क्रमांक ८ मध्ये जनसेवेच्या नव्या पर्वाला सुरुवात झाली असून, नागरिकांच्या प्रश्नांना प्राधान्य देत विकासाचा संकल्प प्रत्यक्षात उतरविण्याच्या दिशेने हे जनसंपर्क कार्यालय महत्त्वाचे पाऊल ठरणार आहे.

तहसीलदार जयराज देशमुख यांचे द्वारे मुख्यद्वारे मुख्यमंत्र्यांना निवेदन

| सांगावा न्यूज | पिंपरी चिंचवड, दिनांक २ नोव्हेंबर २०२६ : महाराष्ट्र राज्यामध्ये विविध जिल्ह्यांमध्ये दुष्काळाची गंभीर परिस्थिती असून शेती व शेतीवर अवलंबित सर्व घटक यामध्ये बाधित झालेला आहे या सर्व घटकांना अर्थसाह्य देण्यात यावे व दुष्काळ निवारण्यासाठी प्रभावी उपाययोजना करण्याबाबत दुष्काळ निवारण व निर्मूलन समिती पिंपरी चिंचवड तर्फे पिंपरी चिंचवड शहरातील विविध संघटनांच्या वतीने आज रोजी तहसीलदार यांना निवेदन देण्यात आले. 

यावेळी जेष्ठ नेते मानव कांबळे, मा. नगरसेवक मारुती भापकर, कामगार नेते काशिनाथ नखाते, काँग्रेस शहराध्यक्ष नरेंद्र बनसोडे, मराठा सेवा संघाचे प्रकाश जाधव, संभाजी ब्रिगेड शहराध्यक्ष सतीश काळे, प्रदीप पवार, इरफान चौधरी, सहदेव होनमने यांच्यासह अनेक कार्यकर्ते उपस्थित होते.

दुष्काळ निवारण आणि निर्मूलन समिती समिती - पिंपरी चिंचवड शहरातील कार्यकर्त्यांच्या वतीने आज, राज्यातील दुष्काळग्रस्त भागातील शेतकरी, शेतमजूर, विद्यार्थी, पशुपालक, मच्छीमार, कारागीर समूह, महिला व वंचित घटकांना तातडीने आर्थिक मदत देऊन, दुष्काळ निवारणासाठी प्रभावी उपाय योजना राबविण्यात यावी. दुष्काळग्रस्त शेतकरी शेतकऱ्यांना आर्थिक मदत करावी. दुष्काळातील दुष्काळग्रस्त गावा गावे वाड्यावर त्यांना स्वच्छ पिण्याचे पाणी उपलब्ध करून द्यावे. जलसंधारणाची कामे प्राधान्याने हाती घेऊन त्यातून स्थानिकांना रोजगार निर्माण करावा. दुष्काळग्रस्त कुटुंबातील मुलांना शिक्षण सुरू राहण्यासाठी या वर्षी व पुढील वर्षी आर्थिक मदत द्यावी. दुष्काळग्रस्त भागात विकसित भारत रोजगार व आजीविका हमी योजना अंतर्गत कामाची उपलब्धता करून द्यावी. पशुधनासाठी मोफत चारा पाणी पशुवैद्यकीय सेवा चारा डेपो छावण्या उपलब्ध करून द्यावा. सार्वजनिक वितरण व्यवस्थेतून प्रतिव्यक्ती दहा किलो धान्य निर्माण करून द्यावे. आदी मागण्यांचा समावेश होता.