Sangava News

विविध विषयांचे आणि कार्यपद्धतींचे व्यावहारिक ज्ञान कमवा शिका योजनेतून विद्यार्थांना आत्मसात 

| सांगावा न्यूज |सांगवी, दिनांक  ४ सप्टेंबर २०२६ : पुणे जिल्हा शिक्षण मंडळाच्या बाबुरावजी घोलप महाविद्यालयात विद्यार्थी विकास मंडळ अंतर्गत विद्यार्थी विकास मंडळ व कमवा व शिका योजनेचे उद्घाटन समारंभ दिनांक ०४ सप्टेंबर २०२६ रोजी बाबुरावजी घोलप महाविद्यालय सांगवी येथे करण्यात आले.   

विद्यार्थ्यांनी शिक्षणासोबत कामाची प्रतिष्ठा, कौशल्य विकास आणि सामाजिक जबाबदारीची जाणीव आत्मसात करावी, या उद्देशाने ‘कमवा व शिका’ योजनेचे प्रभावीपणे कार्य सुरू आहे. या योजनेच्या माध्यमातून आर्थिकदृष्ट्या गरजू विद्यार्थ्यांना शिक्षण घेत असताना कामाची संधी उपलब्ध करून देण्याबरोबरच त्यांच्या व्यक्तिमत्त्व विकासावरही भर दिला जात आहे.

कार्यक्रमाच्या अध्यक्षस्थानी महाविद्यालयाचे प्राचार्य डॉ. पंडित शेळके( सहयोगी अधिष्ठता, भौतिकशास्त्र मंडळाचे अध्यक्ष, सावित्रीबाई फुले पुणे विद्यापीठ पुणे ) होते. यावेळी विद्यार्थ्यांना मार्गदर्शन करत असताना विद्यापीठाच्या मुख्य कॅम्पसवरील तसेच संलग्न महाविद्यालयांतील विद्यार्थ्यांना समान हक्क आणि सुविधा मिळाव्यात, यासाठी प्रयत्न करण्यात येत असल्याचे यावेळी नमूद करण्यात आले. ग्रामीण आणि आर्थिकदृष्ट्या दुर्बल विद्यार्थ्यांना आर्थिक अडचणींमुळे शिक्षणापासून वंचित राहावे लागू नये, हा कर्मवीर भाऊराव पाटील यांच्या विचारांचा या योजनेमागील मूलभूत उद्देश प्राचार्य डॉ. पंडित शेळके यांनी सांगितले. तर तसेच ‘कमवा व शिका’ योजनेसोबतच निर्भय कन्या अभियान, आपत्ती व्यवस्थापन, व्यक्तिमत्त्व विकास यांसह ३३ हून अधिक विद्यार्थी विकासाभिमुख उपक्रम राबविले जात असल्याची माहिती देण्यात आली. आपत्तीच्या प्रसंगी केवळ प्रेक्षक न राहता जखमी व्यक्तीला तातडीने मदत करण्याची सामाजिक जबाबदारी विद्यार्थ्यांमध्ये निर्माण झाली पाहिजे, असेही आवाहन करण्यात आले.

 विद्यार्थी विकास अधिकारी डॉ. विजय घाडगे यांनी ‘कमवा व शिका’ योजनेचा विस्तार, उद्दिष्टे आणि विद्यार्थ्यांसाठी असलेल्या विविध संधींबाबत मार्गदर्शन केले. ‘कमवा व शिका’ योजना ही केवळ शारीरिक श्रम करण्यापुरती मर्यादित न राहता विद्यार्थ्यांना विविध कौशल्ये आत्मसात करण्याचे माध्यम ठरावी, असा संदेश यावेळी डॉ. विजय घाडगे यांच्याद्वारे देण्यात आला. विद्यार्थ्यांनी गवत काढणे, बागकाम करणे याबरोबरच प्रशासकीय फायलिंग, प्रोजेक्ट ड्राफ्टिंग, तांत्रिक उपकरणांचा वापर यांसारखी कामे शिकावीत, यावर भर देण्यात आला. तसेच विद्यार्थ्यांना दर दोन महिन्यांनी वेगवेगळ्या विभागांत काम करण्याची संधी दिल्यास त्यांना विविध विषयांचे आणि कार्यपद्धतींचे व्यावहारिक ज्ञान मिळेल, असेही सांगण्यात आले.

 तसेच कार्यक्रमाचे समन्वयक व सूत्रसंचालक म्हणून डॉ. रमाकांत कस्पटे हे भूमिका बजावत असताना त्यांनी विद्यार्थ्यांना कामातून अनुभव, अनुभवातून ज्ञान आणि ज्ञानातून व्यक्तिमत्त्व विकास साधला पाहिजे, असा संदेश यावेळी दिला. सदर उद्घाटन प्रसंगी वनस्पतीशास्त्र विभाग प्रमुख डॉ. चंदा हासे, राज्यशास्त्र विभाग प्रमुख डॉ. भारत राठोड, मराठी विभाग प्रमुख डॉ. विजय बालघरे आदी मान्यवर उपस्थित होते. या उद्घाटनाच्या यशस्वितेसाठी विद्यार्थी विकास मंडळातील समिती सदस्य प्रा. शीतल शेकडे, प्रा. गणेश कटारिया, प्रा.वैभव बांगले तसेच प्रा. संतोष सास्तुरकर आणि प्रा. महेश खरात, प्रा.प्रविण खाडे उपस्थित होते.

कार्यक्रमाचे सूत्रसंचालन डॉ. रमाकांत कस्पटे यांनी केले तर आभार प्रदर्शन डॉ. अरबाज सैय्यद यांनी केले. कार्यक्रमाचे छायाचित्रण प्रणीत पावले यांनी केले.

बंधू प्रेम, विश्वास, आपुलकी आणि व्यसनमुक्त जीवन हाच आजच्या रक्षाबंधन दिनाचा संकल्प __प्रा. संजय इंगळे 

| सांगावा न्यूज | लोणावळा, दिनांक ३१ ऑगस्ट २०२६ : रक्षाबंधनाच्या पवित्र पर्वानिमित्त सोबर लाईफ व्यसनमुक्ती केंद्र, लोणावळा येथे भावनिक आणि प्रेरणादायी वातावरणात रक्षाबंधनाचा कार्यक्रम उत्साहात संपन्न झाला. दिनांक २८ ऑगस्ट रोजी संपन्न झालेल्या या कार्यक्रमाला लोणावळा येथील सामाजिक कार्यकर्ते सेबस्टीन जोसेफ यांची प्रमुख उपस्थिती लाभली. यावेळी त्यांनी व्यसनमुक्तीच्या प्रवासात प्रेम, आपुलकी, कुटुंबीयांचा आधार तसेच समाजाची सकारात्मक भूमिका अत्यंत महत्त्वाची असल्याचे सांगितले. व्यसनाच्या विळख्यातून बाहेर पडणाऱ्या व्यक्तींना समाजाने स्वीकारून त्यांना नव्या आयुष्याची संधी द्यावी, असे उपस्थितांना आवाहनही त्यांनी केले.

यावेळी व्यसनमुक्ती केंद्राचे संचालक प्रा.संजय इंगळे यांनी रक्षाबंधनाचे सामाजिक व भावनिक महत्त्व विशद केले. “राखीचा धागा हा केवळ भाऊ-बहिणीच्या नात्याचे प्रतीक नसून, एकमेकांना आधार देण्याची, चुकीच्या वाटेपासून दूर ठेवण्याची आणि नव्या आयुष्याची सुरुवात करण्याची प्रेरणा देणारा धागा आहे,” असा संदेश त्यांनी दिला"

जगात समाजात वावरताना स्वतःचे रक्षण स्वतः करावे लागेल, म्हणून आजचे स्वरक्षणाचे धडे विसरू नका__संगीता जगताप (प्राचार्या)

| सांगावा न्यूज | पिंपरी चिंचवड, दिनांक २९ ऑगस्ट २०२६ :  पुणे जिल्हा शिक्षण मंडळाच्या बाबुरावजी घोलप महाविद्यालय, सांगवी येथे २९ ऑगस्ट रोजी मेजर ध्यानचंद जयंती व राष्ट्रीय क्रीडा दिनानिमित्त विद्यार्थिनींसाठी स्वसंरक्षण प्रशिक्षण कार्यशाळा पार आयोजित केली. शारीरिक शिक्षण व क्रीडा विभाग, अँटी रॅगिंग सेल, आय सी सी, शिस्त समिती आणि राणीलक्ष्मीबाई ब्रिगेड यांच्या संयुक्त विद्यमाने आयोजित  घोलप महाविद्यालयात संपन्न झेलल्या विद्यार्थिनींसाठी स्वसंरक्षण प्रशिक्षण शिबिरात ८४ विद्यार्थिनी व ५० महिला प्राध्यापिकांनी सक्रीय सहभाग नोंदविला.

समन्वयक डॉ. विद्या पाठारे आणि डॉ. अमृता इनामदार यांनी महिला व विद्यार्थिनींसाठी स्वसंरक्षणाची गरज लक्षात घेता याचे महत्त्व पटवून देऊन स्वतः कार्यक्रमासाठ प्रमुख उपस्थिती दर्शविली. पाहुण्यांनी केवळ मार्गदर्शन न करता सर्व ८४ विद्यार्थिनींकडून प्रत्यक्ष प्रात्यक्षिके करून घेतली. रस्त्यात, बसमध्ये, लिफ्टमध्ये छेडछाड झाल्यास सुटका कशी करावी, हात पकडल्यास अंगठ्याच्या बाजूने हात सोडवणे, मागून हल्ला झाल्यास कोपर व टाचेने प्रतिकार करणे आणि पेन, चावीचा शस्त्र म्हणून वापर करणे याचा प्रत्येक विद्यार्थिनीने प्रत्यक्ष सराव केला. हे प्रशिक्षण केवळ प्रात्यक्षिकापुरते मर्यादित न राहता, प्रत्येकीला वैयक्तिकरित्या करून पाहण्याची संधी दिल्याने आत्मविश्वास वाढला. तसेच घरगुती हिंसा विषयी मार्गदर्शन करून १८१, ११२ हेल्पलाईन व कायद्याची माहिती उपस्थित विद्यार्थिनींना दिली.

अध्यक्षीय मनोगतामधे प्राचार्या डॉ. संगीता जगताप म्हणाल्या, "ध्यानचंद जयंतीनिमित्त क्रीडा दिन साजरा करताना विद्यार्थिनींना सक्षम बनवणे हा आमचा उद्देश आहे. महाविद्यालयात CCTV व सिव्हिल ड्रेसमधील पोलीस कॉन्स्टेबलमुळे परिसर १००% सुरक्षित आहे. तसेच महाविद्यालयात लैंगिक अत्याचार प्रतिबंध समिती (ICC) सक्रियपणे कार्यरत असून, त्रास झाल्यास विद्यार्थिनींनी घाबरू नये, त्वरित करावी, तिची ओळख गोपनीय ठेवली जाईल. बाहेरील जगात स्वतःचे रक्षण स्वतः करावे लागेल, म्हणून आजचे धडे विसरू नका."

| सांगावा न्यूज | थेरगाव, दिनांक २८ ऑगस्ट २०२६ : महाराष्ट्र नाभिक महामंडळ पिंपरी-चिंचवड शहर महिला आघाडीच्या वतीने थेरगाव येथील अग्निशमन केंद्रात रक्षाबंधन सण आज उत्साहात साजरा करण्यात आला. संकट काळात स्वतःचा जीव धोक्यात घालून कर्तव्य बजावणाऱ्या अग्निशमन दलाच्या जवानांना राखी बांधून महामंडळाच्या वतीने त्यांच्याबद्दल कृतज्ञता व्यक्त करण्यात आली. 

कार्यक्रमाच्या सुरुवातीला महाराष्ट्र नाभिक महामंडळ पिंपरी-चिंचवड शाखेच्या महिला शहराध्यक्ष रुपालीताई गोरे यांनी उपस्थितांचे स्वागत केले. या प्रसंगी पुणे जिल्ह्याच्या माजी महिला अध्यक्षा अनिताताई मगर मुख्य अतिथी म्हणून उपस्थित होत्या. अग्निशमन केंद्रातील मुकेश बर्वे, प्रतिक कांबळे, संभाजी दराडे, ऋषिकेश काळे, प्रतीक खांडगे, निकलेश सुतार, अनिल हाके, तेजस चौगुले, अभिषेक अवताडे, नारायण म्हस्के, संकेत जाधव आणि यश सरोदे या कर्मचाऱ्यांनी या उपक्रमात उत्स्फूर्त सहभाग घेतला. 

जवानांसोबतच महामंडळाच्या महिला पदाधिकाऱ्यांनी पुरुष पदाधिकाऱ्यांनाही राखी बांधून समाजात बंधुभाव जपण्याचा संदेश दिला. हा कार्यक्रम यशस्वी करण्यासाठी अनिल कारेकर, पिंपरी-चिंचवडच्या कोषाध्यक्ष वनिता कारेकर, अमृता गोरे, प्रिती मोरे, सारिका शिंदे आणि पिंपरी-चिंचवडच्या माजी महिला शहराध्यक्ष शुभदा राऊत यांनी विशेष परिश्रम घेतले. कार्यक्रमाचे सूत्रसंचालन महाराष्ट्र नाभिक महामंडळ पुणे जिल्ह्याचे अध्यक्ष अशोकराव मगर यांनी केले, तर संघटक संतोष गोरे यांनी उपस्थितांचे आभार मानले. या उपक्रमामुळे अग्निशमन दलाच्या जवानांमध्ये आनंदाचे आणि समाधानाचे वातावरण पाहायला मिळाले.

मराठा समाजाने मोठ्या संख्येने उपस्थित राहण्याचे काळे यांचे आवाहन

| सांगावा न्यूज | पिंपरी चिंचवड, दिनांक २५ ऑगस्ट २०२६ : मराठा आरक्षणाच्या प्रश्नावर निर्णायक भूमिका घेण्यासाठी २९ ऑगस्ट रोजी अंतरवली सराटी येथे होणाऱ्या निर्णय आंदोलनासाठी पिंपरी चिंचवड शहरातून शेकडो मराठा समाजबांधव सहभागी होणार आहेत. या आंदोलनात पिंपरी चिंचवड शहरातील मराठा समाजाने मोठ्या संख्येने उपस्थित राहावे असे आवाहन मराठा क्रांती मोर्चाचे समन्वयक सतीश काळे यांनी करून मध्यम प्रतिनिधींना माहिती दिली.

मराठा आरक्षणाचा लढा हा केवळ आरक्षणाचा प्रश्न नसून मराठा समाजाच्या न्याय्य हक्कांचा आणि भवितव्याचा प्रश्न आहे त्यामुळे २९ ऑगस्ट रोजी अंतरवाली सराटी येथे होणारे आंदोलन अत्यंत महत्त्वाचे आहे या आंदोलनासाठी पिंपरी चिंचवडमधून मोठ्या संख्येने कार्यकर्ते व समाजबांधव अंतरवाली सराटीकडे रवाना होणार आहेत. सरकारने यापूर्वी अनेक वेळा मराठा समाजाला आश्वासने देऊन फसवणूक केली आहे. त्यामुळे आता केवळ आश्वासन नको तर मराठा आरक्षणाबाबत ठोस आणि निर्णायक निर्णय हवा २९ ऑगस्टचा लढा हा आपल्या हक्कासाठीचा निर्णायक लढा आहे. पिंपरी चिंचवड शहरातील प्रत्येक मराठा बांधवाने अंतरवाली सराटी येथे मोठ्या संख्येने उपस्थित राहून आपली एकजूट दाखवावी असे आवाहन मराठा क्रांती मोर्चाच्या वतीने करण्यात आले आहे.

संघर्ष योद्धा मनोज जरांगे पाटील यांच्या नेतृत्वात मराठा समाजाच्या न्याय्य मागणीसाठी शांततापूर्ण आणि लोकशाही मार्गाने होणाऱ्या या आंदोलनात पिंपरी चिंचवड शहरातील युवक, महिला तसेच मराठा समाजबांधवांनी मोठ्या संख्येने सहभागी व्हावे असेही मराठा क्रांती मोर्चाच्या वतीने आवाहन करण्यात आले असल्याचे काळे यांनी सांगितले.